Dünya Azərbaycanlılarının Həmrəylik günü və Yeni İl təbriki

Əziz həmvətənlər,
 
Sizi qarşıdan gələn Dünya Azərbaycanlılarının Həmrəylik günü və Yeni İl münasibətilə səmimi qəlbdən təbrik edir, Sizə və ailənizə can sağlığı, zənginlik və xoşbəxtlik arzu edirəm. Bildiyiniz kimi Azərbaycan və Yaponiya münasibətləri özünün ən parlaq dövrünü yaşamaqdadır. Ölkələrimiz arasında qarşılıqlı səfərlər artmaqdadır. Yaponiya höküməti Azərbaycana böyük maraq göstərir. Gələcəyin Dubayı gözü ilə baxan biznesmenlər isə günü-gündən artmaqdadır. Yaponiyada Azərbaycan məhsulları uğurla satılır. Yaponiya texnikası və investisiyası Azərbaycanda ən mükəmməl formada tədbiq edilməkdədir. Yaponiyaya oxumağa gələn tələbələrimizin sayı hər il artır. Yaponiyanın elm dünyasında Qarabağ araşdırmalarına yer verilməyə başlayıb. Hökümət isə Azərbaycanın ərazi bütövlüyünü tanıyır və hörmətlə yanaşır. Düşünürəm ki, yapon dilini daha çox tələbə öyrənməlidir. 2017-ci ilin Oktyabr ayında Bakıda baş tutmuş Yapon məhsulları sərgisi (Japan EXPO) – də onu göstərdi ki, Azərbaycana eyni zamanda 100 yapon şirkəti gəlsə onlara cavab verə biləcək kadrlarımız yoxdur. Çox azdır. Ona görə tələbələrə səslənirəm ki, yapon dilini mükəmməl formada öyrənin. Biznesmenlərə səslənirəm ki, Azərbaycan və Yaponiyanın biznes mühiti eyni deyil. Bir qonaqlıq verməklə Yaponları özünüzə dost və ya biznes partnyoru hesab etmək doğru deyil. Yaponlar araşdırmaq məqsədilə gəlirlər. Almaya da bilərlər, ala da bilərlər. Bunu hissi qəbul etmək, biznes anlayışının olmaması deməkdir. Daha professional olaq. Bizlər də Yaponiyanı tanıyan şəxslər kimi hər zaman xoş niyyətli insanlara yardım etməyə hazırıq. Yaponiya Azərbaycan arasında münasibətlərin inkişafında müəyyən qədər də olsa payımız varsa bizdən xoşbəxt kimsə ola bilməz. 2018-ci ili daha uğurlu və daha zəngin bir il edəcəyik.
 
Hörmətlə,
Əlibəy Məmmədov
Yokohama, Yaponiya
30 Dekabr 2017

Daha bilikli yoxsa?

Fikir vermişəm hər hansısa bir dili mükəmməl bilən, bir növ professional insan o dili o qədər də gözəl bilməyənə qarşı mülayim və başa düşən olur. Heç zaman kəskin şəkildə qarşı tərəfə səhvini bildirmir. Qarşı tərəf bunu istəyərsə mədəni şəkildə düzəltməyə çalışır. Amma hər hansısa bir dili təzə-təzə öyrənməyə çalışan və ya qarşısındakından özünü daha ağıllı göstərməyə çalışan hər zaman var gücü ilə qarşı tərəfin səhvlərini (fərq etməz qrammatika, söz, intonasiya, vurğu və s) üzünə ən kobud şəkildə bildirməklə və ya ona gülməklə özünü bir növ daha bilikli göstərməyə çalışır. Çox maraqlı tendensiyadır.

 

Ona da fikir vermişəm ki, fərq etməz yapon olsun ya azərbaycanlı, hər bir şəxsin və ya şirkətin daimi maraqları olur. Daimi dostları, partnyorları və işçiləri deyil. Daimi maraqlara xidmət etdikcə səni sevirlər, ən yüksək formada qarşılayırlar, qarşında bir növ yaxşı mənada əsirlər ki, itirməsinlər səni. O ki, maraqlara qarşı gedib, öz hüququnu, haqqını tələb edəndə bir növ məsafə saxlayırlar, saymazdan gəlirlər, haqqında mənfi sözlər deyirlər. Amma sən yenə də öz sahəndə nömrə 1 olanda, özləri müxtəlif yollarla sənə çıxmağa, mükəmməl keçmiş iş birliklərindən dəm vurmağa, digərlərinin yanında filankəs mənim dostumdur, onunla iş partnyoruyuq deməyə başlayırlar. Amma işlər xoş getməyəndə o bizə görə adam olub nəzəriyyəsini yaratmağa həvəsli olurlar. Bunu həm öz şəxsi təcrübəmdən həm də mənimlə yaxın münasibətdə olan iş adamlarının təcrübəsinə əsasən yazıram. Bunun özüdə özlüyündə maraqlı və qəribə tendensiyadır.